Les muertes cuasi tripliquen los nacimientos n’Asturies hasta ochobre

Añu marcáu pola medría de la mortalidá pola pandemia del COVID-19

Asturies sumó ente xineru y ochobre 11.463 muertes, cuasi’l triple de los 4.170 nacimientos contabilizaos nel mesmu periodu, según los datos provisionales asoleyaos esti vienres pola Sociedá Asturiana d’Estudios Económicos y Industriales (Sadei).

Nun añu marcáu pola medría de la mortalidá pola pandemia del COVID-19, el númberu de muertes xubió’l 7,1% al respective de los 10 primeros meses del añu pasáu, mientres que los nacimientos cayeron el 5,1%.