Les empreses d'economía social suponen un 10% del PIB n'España

Asata apuesta por xunir la economía social a la de los cuidaos

N'Asturies hai 500 empreses d'economía social, na so mayoría son cooperatives y dan empléu a más de 4.500 persones. Nel conxuntu del país, estes empreses xeneren el 10% del productu interior brutu. Güei, na Fidma, celebróse'l Día de la Economía Social.

El presidente de l'Agrupación de Sociedades Asturianas de Trabajo Asociado y Economía Social (Asata), Ruperto Iglesias, consideró güei que s'abren "nueves oportunidaes pa la economía social” y naguó pola unión de la economía social cola de los cuidaos.

Nel Día de la Economía Social d'Asturies de la Feria Internacional de Muestres (FIDMA), Iglesias esplicó que s'abren “nueves oportunidaes” pa estes empreses gracies al primer plan estratéxicu de la economía social del Principáu, que “tien que significar un impulsu a les empreses”, y los fondos europeos y especialmente'l PERTE de la Economía social y los Cuidaos que ta dotáu de más de 800 millones.

Esti Perte tien como oxetivos facilitar el tránsitu d'empreses con dificultaes a empreses d'economía social y xunir la economía de los cuidaos a la economía social.

N'Asturies, amás, Asata ta trabayando cola conseyeria de Derechos Sociales nel impulsu d'un llaboratoriu qu'estudie la xunión de la economía social y les zones despoblaes p'avanzar a un modelu distintu.