Les inclemencies meteorolóxiques torguen la retirada del argayu en Casu

Dellos vecinos de la zona xúnense pa construyir un pasu alternativu

Nel conceyu de Casu sigue trabayándose pa retirar los miles de tonelaes de roca que caltienen cortada la carretera a El Puertu Tarna.

La situación ye mui complicada por cuenta de les inclemencies meteorolóxiques. L'agua, el vientu y la nieve en La Collada Arniciu, unu de los pasos alternativos, tán torgando les xeres de desescombru.

La carretera ta cortada dende'l pasáu xueves y pel momentu nun hai feches pa la reapertura.

La situación afecta directamente a los vecinos y, por ello, un grupu d'afectaos xunióse p'habilitar un pasu alternativu.

Un albañil, una empresa de carpintería y un hosteleru construyeron una pequeña ponte que pasaría'l ríu Anzu y dexaría cruciar al otru llau del argayu. La odisea lleva ente 20 y 30 minutos pel monte, per una antigua calzada romana nun llugar conocíu como "el llugar de los infiernos".