Asturies rexistra raches de vientu de más de 90 kilómetru per hora

La lluvia dexa n'Asturies hasta 49,9 llitros per metru cuadráu

Asturies rexistra güei raches de vientu de más de 90 kilómetru per hora, unes de les más fuertes del país, namás per detrás d'Estaca de Bares y Fisterra (A Coruña), nuna xornada na que la rexón ta n'avisu naranxa por vientos d'hasta 110 km/h.

Según los rexistros de l'Axencia Estatal de Meteoroloxía (Aemet), rexistráronse raches de 91 km/h en Taramundi; de 87 en Peñes; de 81 en Llanes y Cabu Bustu, y de 74 en Villayón.

Asturies ta güei n'avisu naranxa por vientos que podríen algamar hasta los 110 kilómetros per hora nel cordal y los Picos d'Europa, hasta les 6:00.

Tamién tán n'avisu mariellu la mariña occidental y la suroccidental, por vientos d'hasta 100 kilómetru per hora, y la central y valles mineros, por raches d'hasta 90 kilómetru per hora.

Énte esta situación dende'l Serviciu d'Emerxencies del Principáu d'Asturies (SEPA) encamienten a la población qu'estremen los procuros.

Por ello pídese que naide s'avere a los cantiles, paseos marítimos y zones peligroses onde les fuertes raches de vientu puen provocar cayíes y na mariña puen ser arrastraos por un golpe de mar.

Tamién s'encamienta revisar los anclaxes de los elementos afitaos nel esterior de les viviendes y prestar atención énte'l peligru de desprendimientos de teyes o otros materiales que puean cayer d'altos.

Les lluvies dexen n'Asturies hasta 49,9 llitros per metru cuadráu

Les intenses lluvies rexistraes na tarde y la nueche d'ayeri dexaron n'Asturies hasta 49,9 llitros per metru cuadráu, les mayores lluvies del país.

Según los rexistros de l'Axencia Estatal de Meteoroloxía (Aemet), les mayores lluvies rexistráronse na zona del aeropuertu d'Asturies, con 49,9 llitros per metru cuadráu, siguíu de Salas, con 47,4 llitros; Peñes, con 42,9; Cabu Bustu, con 39,4, y Castropol, con 38,4.

Dende la pasada medianueche, Asturies tamién rexistra les mayores lluvies del país, con 27,8 llitros per metru cuadráu en Llanes.

Amás, Asturies rexistró anueche les mayores raches de vientu, con 112 kilómetros en Llanes, 97 en Peñes y 91 en Cabu Bustu.