La vocera del Principáu nun ve una falta de collaboración cola rede privada de residencies de mayores

Melania Álvarez destaca que'l Gobiernu nun abrió entá nengún espediente nin a centros públicos nin privaos

La vocera del Principáu afirmó que nun ve una falta de collaboración cola rede privada de residencies de mayores, que n'Asturies sumen 192 equipamientos, y qu'estos son díes complicaos.

El Gobiernu asturianu nun abrió entá nengún espediente sancionador o disciplinariu, en función de la titularidá del centru, escontra residencies de vieyos públiques o privaes pola espansión de la pandemia del COVID-19 nin tien constancia de que la Fiscalía abriera dilixencies d'investigación en nengún centru.

Más de 80 vieyos -ocho d'ellos muertos, seis en Grau y dos en Castrillón- y más d'una trentena de trabayadores contaxáronse del coronavirus na rede de residencies públiques del ERA mientres que nos 192 establecimientos privaos detectáronse casos en seis centros

Según señaló la vocera del Executivu y conseyera de Derechos Sociales y Bienestar, Melania Álvarez, el Principáu trabaya conxuntamente cola Fiscalía p'abordar la situación nestos centros nos que se rexistraron dos biltos, na residencia de Grau y na del Palaciu del Villar, en Castrillón.

"Nun abrimos dilixencies, pero si llegara'l casu y fuera necesario actuaríemos de la manera más contundente", apuntó Álvarez en rueda de prensa tres la xunta del Conseyu de Gobiernu.

La Dirección Xeneral de Xestión de Derechos Sociales anunciara ayeri que, a partir d'esti xueves, entamaría espedientes sancionadores o disciplinarios, en función de la titularidá del centru - o a comunicar al Serviciu d'Inspección de Salú, en casu de ser ésti'l competente pa qu'asina proceda -, pola reiteración na omisión del deber d'unviar la información necesaria.

Según la conseyera, esti requerimientu espresu vien dau pola espublización de la orde ministerial qu'obliga a suministrar esa información. El so incumplimientu deriva implicaciones llegales, y non a que vieren una falta de collaboración por parte de los propietarios de les 192 residencies privaes esistentes n'Asturies coles que'l Principáu ta en contactu dende'l día 19 pa qu'apurran los datos de contaxos.

Tocante a la entrega de material a les residencies pa combatir la pandemia, Álvarez conseñó que'l so departamentu, del que dependen amás de los centros del ERA los destinaos a persones con discapacidá y los de menores, va siguir faciendo el repartu "en función de la disponibilidá" dempués de qu'ayeri se distribuyeren 8.000 mázcarines nos equipamientos pa vieyos.