Les grandes industries, mui pendientes del Real Decretu qu'acuta actividaes y movilidá

Xixón y Avilés amenorguen fondamente les sos llinies de tresporte públicu

Les grandes industries y el tresporte de la rexón son dos de los sectores que güei tán mui pendientes del Real Decretu qu'acuta actividaes y movilidá.

Munches de les empreses industriales asturianes caltienen duldes sobro si tienen que parar la so actividá tres les nueves midíes restrictives decretaes anueche pol Gobiernu central pa frenar la pandemia del coronavirus.

El real decretu-llei espublizáu poco primero de la medianueche ordena'l zarru de toa actividá non esencial pa caltener el funcionamientu del sistema sanitariu, el sector agroalimentariu o'l tresporte de mercancíes, ente otros servicios, lo qu'obligaría al paru de la mayor parte de l'actividá industrial.

Dalgunes como Alu Iberica, Asturiana de Zinc, ArcelorMittal o Santa Bárbara Sistemas tán tratando de clarificar en qué midida la so actividá va vese afectada pol real decretu-llei asoleyáu anueche o si, polo menos, puen caltener delles de les sos llinies de producción.

En Navia, n'ENCE, la producción de celulosa sigue.

Xixón y Avilés amenorguen fondamente les sos llinies de tresporte públicu

El tresporte públicu tamién énte un día de cambeos. Dos de les grandes ciudaes d'Asturies, Xixón y Avilés, amenorgaron fondamente la frecuencia de les sos llinies urbanes. N'Uviéu, pel momentu, caltiénse'l serviciu ensin cambeos.

Nel Polígonu de Roces, fai 15 díes, na primer xornada llaborable del estáu d'alarma, víase tráficu y aparcamientos llenos. Güei, malapenes hai tráficu y los aparcamientos tán vacíos, y la mayoría de los portones tán zarraos y ensin xente.

Mesmu escenariu n'otros polígonos, como'l PEPA d'Avilés esta mañana. Namás dalgún tresportista y aquelles empreses que se dediquen a alimentación o servicios básicos funcionen, anque munchos, cola metá de personal, pa garantizar les medies de protección de los trabayadores.