Un exemplar d’utre foi lliberada nel Parque Natural de Redes dempués de tar los últimos nueve meses nun centru del Principáu, onde foi tratada de les distintes mancadures que presentaba y recibió rehabilitación pa recuperar la so condición física.
L’ave foi recoyida’l 31 d’agostu de 2021 por axentes del Mediu Natural y treslladada al centru de recuperación asitiáu en L'Infiestu, informó’l Gobiernu autonómicu.
El so estáu yera semicomatosu, presentaba desnutrición y deshidratación graves y una fractura nel ala izquierda.
Dempués de los primeros cuidaos, y una vegada superaes les mancadures, foi treslladada al voladeru esterior del equipamientu pa recuperar musculación y les condiciones afayadices de vuelu.
Como davezu, enantes de proceder a la so lliberación, polos Axentes del Mediu Natural y personal técnicu de la Conseyería de Mediu Rural y del CSIC-Universidá d’Uviéu, punxéronse-y dos anielles y un emisor GPS que, amás de dexar de facer un siguimientu de la so evolución, algama que l’ave pase a formar parte de la rede centinela de llucha escontra’l velenu y el furtivismu n’Asturies.
© 2024 Radiotelevisión del Principado de Asturias | Todos los derechos reservados
Publicidad | Aviso Legal | Política de privacidad | Política de cookies | Consentimiento de cookies | RSS | Sobre RTPA | Entidad adherida a AUTOCONTROL