El Conceyu de Siero aspira a convertir a Llugones nel llugar español con más carriles bici por cada 100.000 habitantes cola implantación de 14 kilómetros d'esti tipu de vía ciclista que la conectará con Uviéu, La Fresneda y el centru comercial Parque Principáu.
El viceconseyeru d'Infraestructures, Movilidá y Territoriu, Jorge García, asistió esti sábadu a la presentación d'una iniciativa que va costar cinco millones d'euros y prevé afitar más de 500 places d'aparcamientos disuasorios.
El viceconseyeru sorrayó la conveniencia de planiar proyectos integrales de tresformamientu de la movilidá pa dar cumplimientu a les directives europees guiaes a la descarbonización.
Proyectos que, nel curtiu plazu, van poder beneficiase de los fondos europeos que'l Ministeriu de Tresportes, Movilidá y Axenda Urbana (Mitma) reserva p'aquellos conceyos de más de 50.000 habitantes, como'l de Siero, punxo de manifiestu.
García señaló, per otru llau, que l'usu del tresporte públicu "sigue bien per debaxo" de los valores previos a la pandemia del coronavirus.
© 2024 Radiotelevisión del Principado de Asturias | Todos los derechos reservados
Publicidad | Aviso Legal | Política de privacidad | Política de cookies | Consentimiento de cookies | RSS | Sobre RTPA | Entidad adherida a AUTOCONTROL