Los arquiteutos piden al Principáu qu'informe de les ayudes disponibles pa la rehabilitación enerxética d'edificios

La empresa Esfer trabaya na reforma d'un edificiu d'Uviéu

Los arquiteutos piden al Gobiernu autonómicu qu'informe de manera más clara sobre les ayudes disponibles pa la rehabilitación enerxética d'edificios. El Colexu Profesional afita que ye'l momentu d'encarar esa reforma del parque de vivienda, aprovechando les subvenciones, que van dende'l 30 hasta'l 80% del costu de la obra.

Gastar menos enerxía, amenorgar les emisiones de CO2 y aprovechar los fondos europeos. Son los motivos polos que'l colexu d'arquiteutos asegura que ye'l momentu de rehabilitar el parque de vivienda.

En 2020 rehabilitaron n'Asturies 7.000 viviendes. En 2021, 8.000. La xestión del Principáu ye bona, dicen los arquiteutos, anque nun ye abondo pa cumplir los oxetivos.

Amás, dende'l Colexu Oficial d'Arquiteutos d'Asturies piden al Gobiernu autonómicu qu'informe de forma más clara sobre les ayudes disponibles.

Los arquiteutos reivindiquen el so papel p'asesorar na tramitación de les ayudes. El colexu cunta con un llistáu d'arquiteutos especializaos a disposición de los ciudadanos.

La empresa Esfer trabaya na reformá d'un edificiu d'Uviéu

Una de les torres blanques del barriu uvieín d'Otero, construyida en 1972. Entós nun esistía entá nenguna normativa sobre aisllamientu térmicu.

La empresa Esfer, cimera en rehabilitación enérxetica, trabaya dende va un añu na reforma del inmueble, nel que viven 88 vecinos.

La subvención cunta con recursos del Principáu y del fondu européu de recuperación. Ayudes indispensables pa que siga habiendo obra y pa faer que los llares seyan más afayadizos, eficientes y llimpios.