Los avistamientos d'osos multiplíquense nel conceyu de Somiedu

Los visitantes tienen que caltenese alloñaos de les zones onde comen los plantígrados

Col avance d'agostu, el frutu del escuernacabres, qu'en Somiedu coincidió anguaño cola llegada de les primeres ablanes, llevó a tres osos a zones visibles del conceyu. Ye temporada alta d'avistamientu de plantígrados, una actividá que multiplicó los visitantes de forma esponencial.

Tomáronse midíes, sicasí, pa que la llegada de turistes seya lo más respetuosa posible col hábitat de los osos. Por exemplu, hasta finales de setiembre llendóse a vecinos y ganaderos l'usu del camín ente los pueblos de Gúa y Caunedu. Los visitantes tienen que caltenese alloñaos d'una zona pela que se mueven davezu los plantígrados.

Estes restricciones, amás, cunten col sofitu de quien va a Somiedu.

El mediu natural y el paisaxe son el principal atractivu d'una zona qu'estos díes ta enllena de turistes.

Vecinos, visitantes y osos conviven nun branu nel que'l turismu enllena Somiedu d'actividá.