Los hermanos Villalba, condergaos a cuatro años de cárcel pol casu Aquagest

Fueron procesaos por un delitu siguíu de falsedá en documentu mercantil y otru de cofechu

El Xulgáu de lo Penal númberu 1 d'Avilés condergó al fundador y ex-conceyal de la estinta Agrupación Social Independiente d'Avilés (ASIA) nel Conceyu avilesín, Miguel Ángel Villalba, y a la so hermana María Elena, tamién ex-edil, a una pena de cuatro años y tres meses de cárcel pol Casu Aquagest, rellacionáu cola axudicación y xestión de les piscines de Corvera.

Los dos hermanos, que tamién tendrán que pagar dos multes de 358.000 euros, fueron condergaos por un delitu siguíu de falsedá en documentu mercantil y otru de cofechu, nel casu de María Elena como cooperadora necesaria nésti últimu.

La Fiscalía pidía pa dambos una pena de siete años de prisión por iguar, ente los años 2009 y 2011, una trama pa recibir pagos d'Aquagest como contraprestación al so votu favoratible pa la concesión de contratos.

Sicasí, la maxistrada, que los absuelve del delitu escontra los derechos de los trabayadores pol que tamién fueren acusaos, afitó la pena en cuatro años y tres meses de cárcel en reconociendo l'atenuante de dilaciones indebíes.