Los sindicatos docentes caltienen el so enzarru indefiníu en defensa de les sos demandes

Lydia Espina ufierta "escucha y diálogu"

Los sindicatos docentes ANPE, CCOO, UXT, SUATEA y CSIF siguen esti martes col so enzarru indefiníu na sede de la Conseyería d’Educación pola "zarrazón" de la titular d’esti departamentu, Lydia Espina, de nun abordar na mesa de negociación les tres principales reivindicaciones d’esti colectivu.

Dempués del so viaxe a Sevilla pa dir a una conferencia presidencial europea venceyada cola FP, la conseyera visitó ayeri pela nueche a los representantes de les organizaciones sindicales enzarraos dende hores enantes, a los qu’avanzó que la xunta de negociación diba adelantase del 6 de payares al 31 d’ochobre.

Según señaló, en declaraciones, el presidente de la Xunta de Personal Docente, Jorge Espina, la titular d’Educación aseguró, sicasí, que namás s’abordaría neses conversaciones l’atribución al colectivu de los díes d’asuntos propios, quedando al marxe les otres dos reivindicaciones: la rebaxa de la xornada llectiva del cuerpu de maestros a 23 horas selmanales y un aliviu de la carga tamién pa los mayores de 55 años.

Per parte de so, la titular d’Educación aseguró que’l so departamentu siempres ta "pa la mano" y caltién un "compromisu d’escucha y dialogu" coles organizaciones sindicales, coles que tuvo dos alcuentros no que va de cursu.