Los sindicatos zárrense n'Hunosa y piden un plan industrial

Los trabayadores van endurecer les movilizaciones si nun hai alcuerdu

Los 11 representantes sindicales na comisión negociadora del Plan d'Hunosa entamaron un encierru na sede que la hullera pública tien n'Uviéu y anunciaron que los mineros van intensificar les sos protestes si nun se presenta un plan industrial que garantice l'empléu actual y la estracción de carbón.

Los delegaos sindicales decidieron zarrase anueche nes oficines de l'Avenida de Galicia tres cinco hores de xunta que concluyeron ensin que la dirección de la hullera pública treslladara una ufierta, según denunciaron güei en rueda de prensa.

Según la parte sindical, la empresa nun concretó les llinies xenerales que van iguar el Plan d'Empresa 2019-2027 nel que quieren que s'incluya un plan industrial, el caltenimientu de l'actividá estractiva y garantíes d'empléu pa los trabayadores de la compañía.

Pa puxar nesi sen, un centenar de trabayadores cortaron güei cerca de media hora l'avenida de Galicia, frente a la sede d'Hunosa, onde llanzaron potentes petardos en sofitu a los zarraos.

Ente ellos, los secretarios xenerales del SOMA-FITAG-UXT y CCOO n'Hunosa, José Luis Alperi y Rubén García, respectivamente, que conseñaron güei que nun hai nenguna propuesta por parte de la dirección y que van dir aumentando la presión y la movilización mientres nun cunten con una ufierta negociable.

A la capacidá negociadora de les partes apelaron güei tanto'l conseyeru d'Empléu, Industria y Turismu, Isaac Pola, como la Delegada del Gobiernu, Delia Losa. Dambos confíen en qu'empresa y sindicatos lleguen a un alcuerdu.