Los trabayadores de TUA van facer fuelga cuatro díes n'avientu y tres en xineru

La empresa atribúi la fuelga a la negativa al sistema anti-alcoholemia

Los trabayadores del serviciu públicu de tresporte d'Uviéu, que xestiona la empresa TUA, convocaron una fuelga pa los díes 4, 13, 18 y 27 d'avientu y 2, 3 y 4 de xineru, con paros de 24 hores, énte los incumplimientos repitíos por parte de la empresa del alcuerdu robláu en 2015.

El presidente del comité d'empresa y delegáu d'USO, Manuel Villaverde, señaló qu'amás del incumplimientu d'esti alcuerdu, la compañía tampoco ta respetando'l descansu nes xornaes continues nin los descansos por hores extras.

Tamién denunció que se desanició unillateralmente la voluntariedá del trabayador na vixilancia de la salú, nun s'atendió'l pidimientu de los servicios hixénicos nes cabeceres de llinia, y amenorgóse la plantiya de trabayadores cola consiguiente precarización del empléu.

Villaverde compareció güei en rueda de prensa xunto a los delegaos de prevención del Comité d’Empresa Óscar Fernández y Juan García.

El Comité d'Empresa decidió convocar los paros, dexando en manes del Conceyu y la compañía la garantía de los servicios mínimos.

TUA atribúi la fuelga a la negativa al sistema anti-alcoholemia

Pela so parte, la empresa TUA considera que la convocatoria de fuelga ye pola esixencia de la retirada del sistema anti-alcoholemia instaláu nos vehículos.

Nun comunicáu, la compañía afirma que "cree que los otros temes son escuses que nun xustifiquen una convocatoria".

TUA considera que'l comité convoca un fuelga porque quier la retirada del "alcolock", sistema que, según la empresa, "torga de manera preventiva que puea arrancar el vehículu si'l conductor superara les tases llegales, por cuanto desanicia’l riesgu de conducción so los efectos d'alcohol".

A esti respecto, la compañía apunta qu'apocayá sufrió actos vandálicos sobro autobuses nuevos y dotaos con sistema alcolock, "con viaxeros a bordo, qu'atenten contra la seguridá física de los viaxeros y implica riesgos nun autobús circulando pela ciudá, con pasaxeros".

Too ello, amiesta la compañía, "ensin escaecer el costu de los desperfectos nin el dañu a la puntualidá de los servicios a los ciudadanos d'Uviéu".

TUA diz desconocer l'autoría de los atacantes, pero apunta a qu'esos ataques "coinciden en fecha cola puesta en marcha de nuevos autobuses con sistema alcolock".

La empresa sorraya qu’esi sistema dexa ufiertar un serviciu de tresporte públicu urbanu de viaxeros "calidable y cola más alta seguridá colos ciudadanos, asegurando'l cumplimientu de la llei al respeuto del siguimientu de les llendes de consumu d'alcohol afitaos pola normativa llaboral vixente".

TUA amiesta que'l sistema yá ta en funcionamientu n'autobuses d'otres compañíes de tresporte públicu d'Asturies, "con total normalidá" y que la Inspección de Trabayu dio llegalidá al sistema, "a requerimientu del Comité d'Empresa".

Poro, TUA considera que "el restu de temes plantegaos pol Comité d'Empresa son escuses que traten d’esconder que’l so únicu interés ye retirar l’alcolock".