Manifestación multitudinaria a favor de la cooficialidá del asturianu

En metá de les negociaciones sobre la reforma del Estatutu d'Autonomía y la posibilidá d'inxertalu como llingua oficial

Miles de persones -más de 30.000 según los organizadores- manifestáronse güei pel centru d’Uviéu pa reclamar la oficialidá del asturianu, una movilización que dende va 34 años lleva alantre la Xunta pola Defensa de la Llingua Asturiana y qu’esta vegada celébrase en metá de les negociaciones abiertes ente’l Gobiernu autonómicu y les fuerces parllamentaries p’alcordar una reforma estatutaria qu’inxerta esta cuestión.

El PSOE comprometióse a impulsar la cooficialidá del asturianu nel so últimu congresu, una midida que cunta tamién col sofitu de Podemos y IX, y la oposición frontal del PP, Ciudadanos y Vox, mientres que Foro, que tien la llave pa que s’apruebe esa reforma estatutaria, entá nun esclarió cuála sedrá la so posición final, anque ún de los sos dos diputaos, Adrián Pumares, yá dixo que ye partidariu d’una oficialidá basada na voluntariedá y non na imposición.