Más de 100 elementos de maquinaria y ferramienta formen el patrimoniu industrial de la Sienda Verde de Turón

L’Asociación Cultural y Minera Santa Bárbola reclama un espaciu dignu pa estes pieces

Namás na sienda verde del Valle de Turón hai más de 100 elementos de patrimoniu industrial. Maquinaria y ferramienta que relaten la historia minera nesta zona y en toles Cuences Mineres. L’Asociación Cultural y Minera Santa Bárbola reclama dende va tiempu un espaciu dignu pa estes pieces, munches, úniques n’España.

Una locomotora que cumple 102 años de la so llegada a Asturies. Fabricada n’EEXX en 1917, sufre dende 2007 les inclemencies del tiempu y l’espoliu.

Como ella, 107 elementos nos 15 kilómetros de la Sienda Verde de Turón, recoyíos nun inventariu fechu pola asociación, presentáu a les alministraciones va dos años.

Parte de la historia industrial d’Asturies cumple agora, según denuncia la sección d’arqueoloxía industrial de la entidá una función ornamental, como nesti casu, en rotondes, y al pie de les carreteres.

Ensin nengún tipu de protección, más d’una ventena sedríen pieces úniques, de gran valir. Tolo que despaeza agora, nun volverá.

Dende l’Asociación Cultural y Minera apuesten va tiempu pol yacimientu de Santa Bárbola, primer pozu Bien d’Interés Cultural d’España, a la espera d’agospiar dellos proyectos espositivos.