Más d'un centenar de tractores pasen la nueche n'Uviéu

Decenes de tractores siguen bloquiando dende ayeri'l tráficu nel centru de la ciudá

Los sindicatos agrarios URA y Usaga caltienen la protesta nes cais d'Uviéu col centru de la ciudá bloquiáu por decenes de tractores a la espera de la resultancia de la xunta qu'esti vienres caltienen col conseyeru de Mediu Rural y Política Agraria, Marcelino Marcos, al que van esponer les reivindicaciones del sector.

Los ganaderos y llabradores decidieron anueche n'asamblea siguir cola protesta entamada ayeri pela mañana al considerar insuficiente la respuesta del Principáu, dempués de qu'a última hora de la tarde la directora xeneral de Ganadería, Rocío Huerta, garantizára-yos qu'aquellos que cunten colos trámites fechos van ver completaos los pagos de la Política Agraria Común a finales de febreru.

URA y Usaga llograron axuntar ayeri a cientos de ganaderos de toa Asturies que protagonizaron una tirante protesta nel centru d'Uviéu, sobre manera a la so llegada a la sede de la Presidencia del Principáu, onde la Policía Nacional tuvo que cargar nun par d'ocasiones escontra un grupu de persones que trató de saltase'l gordón de seguridá, unos incidentes que, sicasí, acabaron ensin detenciones.