El Gobiernu d'Asturies entama güei la prueba del procesu selectivu pa ocupar 399 places de celador nel Serviciu de Salú del Principáu (Sespa), na que s'apuntaron 26.023 aspirantes.
Ye'l procesu más multitudinariu de la ufierta d'empléu públicu de 2018 y de la hestoria de les oposiciones na comunidá.
Miles d'opositores enllenaron güei'l recintu ferial de Xixón nuna convocatoria histórica. Coles nos accesos a primer hora, cuando entá faltaben hasta dos hores pa qu'entamara l'esame. La convocatoria de la mañana foi multitudinaria, anque menos de lo que s'esperaba porque finalmente presentáronse un 40% menos d'aspirantes. Les pruebes tuvieron un llargor de 120 minutos.
Entá asina, baturiciu y atascos pela redolada del recintu ferial que concentra'l mayor númberu d'opositores.
El desarrollu del procesu obligó al Sespa a movilizar un importante dispositivu loxísticu pa la prueba que se desarrolla en dos turnos, de mañana y tarde, y en cuatro sedes: el recintu ferial Luis Adaro, la Escuela Politécnica d'Inxenieros y los aularios norte, dambos nel campus universitariu, y en Llaboral Centru d'Arte.
La Empresa Municipal de Tresportes Urbanos de Xixón (Emtusa) punxo a disposición de los aspirantes, de forma gratuita, un serviciu llanzadera nomáu Llinia circular, que xune les sedes de los esámenes y les zones d'aparcamientos.
Los más beneficiaos con tantu opositor son los hosteleros de la redolada del recintu ferial. Amás, dase la circunstancia de que güei tamién había rastru na ciudá asina que, la contorna de La Guía y El Molinón tuvieron abondos atascos y convirtióse n'imposible lo d'atopar una plaza d'aparcamientu.
© 2024 Radiotelevisión del Principado de Asturias | Todos los derechos reservados
Publicidad | Aviso Legal | Política de privacidad | Política de cookies | Consentimiento de cookies | RSS | Sobre RTPA | Entidad adherida a AUTOCONTROL