Mimique, accesorios de piel fechos de manera artesanal

María y Yolanda Castellano son les fundadores de la marca asturiana​

Mimique ye una marca creada por dos hermanes ximielgues d’Uviéu va ocho años. María y Yolanda Castellano son economistes, y dempués de dellos años nel mundu de les finances, decidieron emprender en moda. Faen a mano accesorios de piel: Mochiles, bolsos, cinturones, llaveros, y fundes pa móvil, sombreros y yá tienen prototipos de carteres.

Una mochila con ases pa usar tamién de bolsu, con un patrón básicu que deprendió a facer Yolanda nun taller de Cáritas en Berlín, foi’l so primer diseñu. Fueron meyorándolu y amestaron detalles. Amás de los diseños que faen elles, creen productos personalizaos. El so estilu ye d’accesorios mui funcionales, atemporales, de llinies cencielles, y con colores que combinen con toles prendes.

La marca Mimique yá tien una empleada amás de les emprendedores, y considérase lo qu’en moda llamen 'slow fashion', ye dicir, moda sostenible. Significa apostar por diseños que respeten a los trabayadores y el mediu ambiente, y productos de calidá que duren nel tiempu. Un métodu y una ética que se volvió tendencia n’España.

El meyor escaparate pa ello son les redes sociales. Los más de los veceros de Mimique contacten per Instagram, onde cunten con 29.000 siguidores. Tamién venden na so web, y dalgún, pero menos, en tiendes que tienen como puntos de venta.

Elles creen, confeccionen, faen la publicidá en redes y venden online. Unes emprendedores d’Uviéu que xestionen tolos procesos, al empar qu’apuesten pola moda de calidá y sostenible.