Los candidatos a liderar el PSOE de Xixón llamen a fortalecer el partíu

Un millar de militantes van escoyer al nuevu Secretariu Xeneral de la formación local

Los dos candidatos a la Secretaría Xeneral del PSOE de Xixón, Iván Fernández Ardura y Monchu García, coincidieron esti sábadu na necesidá de fortalecer l'agrupación anque nun se punxeron d'alcuerdu ente la necesidá de continuidá o cambéu.

Asina lo treslladaron nos sos discursos na asamblea congresual que'l PSOE celebra esti fin de selmana nel Atenéu Obreru de La Calzada hasta onde se movieron dirixentes como'l presidente autonómicu, Adrián Barbón, o l'alcaldesa de Xixón, Ana González.

“Volvimos ser el partíu de Xixón”, afirmó l'actual secretariu xeneral y aspirante a la reelección, Iván Fernández Ardura, nel so discursu de presentación de la so candidatura, nel que defendió'l llabor de l'actual comisión executiva que llogró aumentar la militancia y recuperar l'Alcaldía tres nueve años de gobiernu de Foro.

Fernández Ardura pidió l'enfotu de los militantes pa que la nueva comisión executiva siga trabayando pa que Xixón tenga un PSOE “fuerte” qu'atienda les demandes de la ciudadanía y siga meyorando.

La continuidá foi la piedra angular del discursu de Fernández Ardura, que naguó por reforzar el contactu cola cai, atraer xente nuevo o faer del partíu un "calce de participación”.

“Adrián, somos una familia y les families tamién se dicen les verdaes”, fueron les palabres coles que Monchu García entamó la so intervención citando un estractu del discursu del presidente autonómicu.

Les llamaes a la integración y al diálogu protagonizaron el discursu de Monchu García, que denunció que ye daqué que nun se practicó dempués de l'asamblea congresual de 2017 na que Ardura ganó a la so candidatura por una diferencia de 27 votos.

“Daqué rompióse en Xixón en 2017, xente que se quería de verdá alloñóse”, denunció García, que llamó a sentase a falar ensin rensía porque'l partíu ye “un espaciu de reflexón política”

García consideró que les coses nun se fixeron bien nestos cuatro años y apostó por recuperar el lideralgu “con empatía”, convertir el partíu nun espaciu de convivencia, abrir les puertes del partíu y dar formación.

“Nun pue haber vencedores y vencíos”, destacó García, quien avanzó que si él gana, nun va haber “nin un compañeru que se sienta mal” y tol mundu cabrá nel PSOE.

Tres una primer xornada na qu'un 81% de los presentes ratificaron la xestión de la executiva de Fernández Ardura les urnes de votación van tar abiertes hasta les 20:00 hores pa conocer el nome de la persona que va encabezar l'agrupación los próximos cuatro años.