Arguyu frente a prexuicios

El Principáu constitúi l'Observatoriu Asturianu escontra la LGTBIfobia

El colectivu LGTBI celebró'l Día del Arguyu con actos per toa Asturies.

Nel Conceyu de Llangréu hebo un plenu monográficu en defensa de los sos derechos.

Federico García Lorca, Gloria Fuertes, o los transexuales Laith Ashley y La Veneno, referentes LGTBIQ fueron representaos como homenaxe nun mural de Llanera, onde nun podía faltar la representación local con Gus García, precursor del movimientu en Llanera.

Uviéu volvió asitiar la fecha de color arcu la vieya n'El Campo San Francisco. Amás, tanto'l Conceyu como'l Teatru Campoamor allumáronse colos seis tonos de la bandera gai.

Per otru llau, entamó l'Observatoriu Asturianu escontra la LGTBIfobia. L'oxetivu ye atayar la violencia escontra esti colectivu, por casu, na redolada llaboral. El mes que vien, el Principáu va poner en marcha tamién un teléfonu d'atención a víctimes.

La conseyera de Presidencia, Rita Camblor presidió güei la xunta constitutiva del Observatoriu.

Esti Observatoriu integra a representantes de les direcciones xenerales con competencies en Xusticia, Salú Pública, Ordenación, Evaluación y equidá educativa; Deporte y Interior; y delegaos de los colexos d'Abogaos d'Uviéu y Xixón, de la Oficina d'Asistencia a les Víctimes de Delitos Violentos, representante de la Federación Asturiana de Conceyos, de la Unidá d'Igualdá de la Universidá d'Uviéu, de los sindicatos y de les entidaes LGTBI d'ámbitu autonómicu.​
.