Uviéu axúntase pola música en directo

Esixe al Principáu que desbloquee la prohibición de música en directo

Conceyales del equipu de gobiernu d’Uviéu, con delles asociaciones vecinales, culturales y d’hostelería, pidieron al Principáu que desbloquee la prohibición de la música en directo nos locales que tán bien insonorizaos.

Presentaron en rueda de prensa un manifiestu col lema "nin un acorde de menos, nin un decibeliu de más", nel que declaren que la música en directo y el descansu vecinal son "compatibles", y piden que s’acabe de forma urxente con esa situación "absurda".

Nesti escritu, critiquen que la redacción de la llexislación autonómica sobre Espectáculos y Mediu Ambiente nun ye "clara dafechu" y esixen al Principáu qu’aclare si dexen o non facer espectáculos musicales en vivo en locales con llicencia de música amplificada.

El conceyal de Cultura, Roberto Sánchez Ramos, recalcó la importancia "fundamental" de la cultura como seña d’identidá d’una ciudá "moderna", y que, pela parte de so, hai voluntá política pa sentase a negociar esti asuntu.

Per otra parte, la vicealcaldesa d’Uviéu, Ana Taboada, manifestó que’l so equipu de gobiernu sofita la cultura y la música en vivo, que ta siendo "vilipendiada", y que punxo en marcha la maquinaria d’organización col Principáu pa camudar la llexislación d’anguaño.

Tamién recalcó que nun ye namái un pidimientu del Ayuntamientu, sinón que delles asociaciones vecinales, culturales y la Universidá d’Uviéu sofiten esta midida, y destacó que cuenten con 14.000 robles que suscriben el pidimientu.

Pa rematar, el conceyal d’Urbanismu y Mediu Ambiente, Ignacio Fernández del Páramo, aseguró que tán trabayando pa solucionar la problemática qu’hai col Real Decretu de Mediu Ambiente pa sacar alantre esta propuesta, y que l'oxetivu de so ye solucionar esti problema "del sieglu XX, y adaptalu al sieglu XXI".