Palabres y xestos, nun día pa reivindicar el fin de toles violencies

La Universidá d'Uviéu sumóse al 25N y programa un actu sobre la protección de les muyeres

Güei ye 25 de payares, Día Internacional de la Eliminación de la Violencia escontra la Muyer, pa denunciar la violencia que se fai escontra les muyeres en tol mundu y reclamar polítiques pal so desaniciu.

Dellos conceyos asturianos ficieron actos pa celebrar esti día y la muestra de que güei nun ye un día normal viose en prácticamente tolos puntos de la rexón.

N'A Veiga regalaron tiestos violetes pa concenciar de la importancia de lluchar escontra la violencia de xéneru. En Cangas cunten dende güei con un espaciu violeta de llectura n'igualdá. Ye un puntu nel que puen atopase 90 llibros de temática rellacionada cola perspectiva de xéneru y pa toles edaes.

Noreña tamién se suma a los actos reivindicativos d'esti xueves. Fáenlo representando'l so nome nunos cubos asitiaos cabo'l consistoriu y que van ser visibles tola selmana. Recueyen frases escontra la violencia machista y encamienten a nun tar pasivos escontra esta llacra.

En munchos conceyos esti mediudía quixeron parar pa que la palabra fuera la protagonista. Palabres y munchos xestos, nun día pa reivindicar igualdá.

La Universidá d'Uviéu sumóse a la conmemoración del Día Internacional pola Eliminación de la Violencia escontra les Muyeres, que tien llugar güei 25 de payares, cola espublización del manifiestu robláu pola Rede d'Unidaes d'Igualdá de Xéneru pa la Escelencia Universitaria.