Pilar Saiz cree nun plan nacional pa la prevención del comportamientu suicida dotáu de medios

Peor datu en cifres de les postreres dos décades

La catedrática de Psiquiatría de la Universidá d'Uviéu, Pilar Saiz, pide que s'apruebe yá un plan nacional pa la prevención del comportamientu suicida dotáu de medios que dexe amenorgar, dixo nel Matinal de TPA, les "brutales" cifres de suicidios que rexistra'l nuesu país.

El plan nacional, defende esta catedrática, tien que tener aspeutos comunes en tolos territorios y ser d'obligáu cumplimientu. Esencial, señala, que recueya l'atención específica y siguimientu a persones en situación de riesgu.

En 2020 suicidáronse n'Asturies 122 persones, seis menos que l'añu anterior. El nuesu país nel so conxuntu rexistró, sicasí, el peor datu de los postreros 20 años.

Nun hai nengún factor, detalla, pa esplicar estes cifres o'l fechu de qu'Asturies siga tando a la cabeza en suicidios.

La pandemia, desveló tamién, afectó a la salú mental de los menores de 30 años. En 2020 morrieron más por suicidiu que pola COVID-19.

Munchos de los casos nun pasaren por una consulta. El retu agora ye detectalos. El so apueste ye implicar a l'Atención Primaria nesti trabayu y dar preseos a la sociedá pa que puean detectar persones que tean en riesgu.