Podemos Llanes presenta una propuesta pa meyorar la calidá de la Formación Profesional del Oriente

La contorna oriental asturiana quier allugar 11 nuevos graos

Podemos Asturies presentó una propuesta pa meyorar la ufierta de Formación Profesional (FP) na contorna oriental que quier afitar 11 nuevos graos centraos n'oficios venceyaos a la informática y nes necesidaes llaborales del territoriu n'ámbitos como l'atención a la dependencia o'l turismu de calidá centráu nel mediu natural.

El plan, desenvueltu dende'l círculu de Podemos en Llanes por César Alonso, profesor xubiláu de FP, tien un estudiu de la situación d'esa enseñanza y la contorna y les víes de meyora posibles con especial atención a la distribución del territoriu pa garantizar una ufierta diversa a los vecinos de los principales nuedos de población.

Según la coordinadora autonómica de Podemos Asturies, Sofía Castañón, la propuesta ye “una referencia pa falar de futuru y vertebración del territoriu, pa que la xente nun se vea forzada a colar pa tener un futuru profesional”, al empar qu'afitó que ye un trabayu “perfectamente replicable nel Occidente”.

Pa la secretaria de Servicios Sociales de la formación morada, Tamara Schulz, anguaño hai una ufierta “desestructurada y desequilibrada, que fai que la xente nuevo tenga que dir a otres contornes" lo que torga “el relevu xeneracional necesariu p'afitar población”, ensin escaecer les oportunidaes que la FP pue xenerar pa persones desemplegaes.