Podemos manifiesta la so meyor disposición pa negociar la reforma del Estatutu

La formación presenta una propuesta que califiquen de 'ambiciosa'

Podemos manifiesta la so meyor disposición y llealtá pa negociar la reforma del Estatutu d'Autonomía. La formación política, que güei presentó les sos propuestes, acompaña la oficialidá del asturianu d'un blindaxe de los derechos sociales, l'aumentu del autogobiernu y más capacidá económica p'Asturies. Los sos responsables consideren que sedría un error históricu nun consiguir aprobar esta reforma.

La oficialidá del asturianu ye l'oxetivu principal d'esta reforma, pero Podemos aprovecha la oportunidá pa presentar una propuesta que califiquen de 'ambiciosa'. Nella blíndense los derechos sociales, pídese más autogobiernu cola negociación del trespasu de nueves competencies y más capacidá económica.

Podemos recuerda la oportunidá histórica que supón l'apertura d'esti procesu, anque'l tiempu ye llendáu.

Otres de les propuestes de Podemos son: desaniciar del Estatutu la denominación de Principáu; la considerancia d'Asturies como nacionalidá histórica; el blindaxe como serviciu públicu de la Universidá d'Uviéu, l'Academia de la Llingua o la RTPA; la reforma electoral y la creación d'una banca pública.