Policíes locales asturianos celebren l'aprobación de la xubilación anticipada

Va poder acoyese quien certifique 37 años de cotización y 15 como axentes de la Policía Local

Allegría ente'l colectivu de policíes locales n'Asturies dempués de l'aprobación del real decretu del Gobiernu que-yos adelanta la xubilación a los 59 años si acreíten determinaos requisitos.

Va poder acoyese quien certifique 37 años de cotización y 15 como axentes de la Policía Local. Tendrán que comunicar la so voluntá enantes del 31 de xineru.

Yá que suelen figurar como alministrativos nos conceyos, p'acreitar la so condición de policía énte la Seguridá Social tendrán que pidir un certificáu a los respectivos consistorios.

La midida afecta n'Asturies a una sesta parte de les plantiyes locales. La posible falta de personal ye, en cualquier casu, una circunstancia que tamién se trató nes negociaciones.

Les partes que negociaron esta modalidá tamién llegaron a un alcuerdu sobre cómo abonar los nuevos pagos.

La posibilidá d'adelantar la edá de xubilación ye una reivindicación histórica d'esti colectivu: la de ser incluyíos nel réxime d'oficios de riesgu y seguridá, como los bomberos o los cuerpos y fuerces de seguridá del Estáu.