Primeres hores de zarru n'Uviéu, Llanes y Cangas

Terraces a mediu gas y poca xente nes cais de los tres conceyos

Terraces a mediu gas y poca xente na cai ye lo avezao esta mañana nos conceyos que güei entraron nes nueves restricciones. En Llanes, Cangas y Uviéu, polo xeneral los ciudadanos entienden les midíes p'atayar la tresmisión del virus, pero pa los hosteleros ye un nuevu varapalu.

N'Uviéu, na Ruta de los Vinos malapenes abrieron media docena de negocios. Los que lo fixeron n'otres zones de la ciudá fáenlo con terraces a mediu gas, serviciu de recoyida y un oxetivu, l'aguantar como seya. Güei'l café o'l vermú toca tomalo nes terraces. Ente los veceros hai resignación y sofitu a los hosteleros.

En Cangas, l'agua que cayó  tola mañana contribuyó a que munchos canguetos optaren por quedar nes sos cases. Mientres qu'unos pocos nun perdonaben el so paséu, otros salíen a faer les compres.

La mesma situación vive güei Llanes, cerráu perimetralmente y cola aplicación de nueves restricciones. Nel conceyu son mui pocos los establecimientos hosteleros que güei abrieron les sos terraces.