Proyectu pilotu de trazabilidá de la botella de sidra

Un códigu QR va dexar al consumidor llegar a la información completa del productu

Les nueves tecnoloxíes y la sidra xúnense. El CTIC y el Conseyu Regulador de la Denominación d'Orixe Protexida Sidra d'Asturies estrenen un proyectu pilotu pa ufiertar al consumidor la información completa sobro la trazabilidá del productu.

Solo hai que lleer el códigu QR col móvil. L'aplicación, desarrollada polos técnicos del CTIC, ufierta información sobro'l procesu d'ellaboración de cada botella de sidra con denominación d'orixe: el tipu de mazana colo que ta fecha, en qué finca se recoyeron, en qué llagar se fabricó y hasta la fecha na que la botella llegó al puntu de venta. L'aplicación usa tecnoloxía 'blockchain', que garantiza la veracidá de los datos.

En menos de 20 años, la botella de sidra pasó de nun tener etiqueta, a usar la tecnoloxía más nueva. Pel momentu solo dos llagares participen nesti proyectu pilotu, que podría estendese al restu de productores que pertenecen a la denominación d’orixe Sidra d'Asturies.

Esta tecnoloxía tamién podría aplicase pa dar a conocer la trazabilidá d'otros productos con denominación d'orixe como'l vinu, les fabes o'l miel.

Dende'l conseyu regulador, el so presidente, Tino Cortina, manifestó'l sofitu a l'Asociación de Sidra Asturiano nel pleitu que caltienen pa que la botella de sidra asturiano nun puea usase por llagareros de fuera de la rexón.