RTPA y la Universidá entamen el 'Datathon'

Una xornada de retos pa estudiantes de xestión de datos

RTPA collabora cola Cátedra de Ciencia de Datos y Marketing de la Universidá d'Uviéu na celebración d'un eventu, el 'Datathon', dirixíu a estudiantes que quieran averase al mundu de los datos d'audiencies televisives.

La cuarta edición va tener llugar el próximu 15 d'abril na escuela Politécnica d'Inxeniería de Xixón y ta dirixida a estudiantes mayores de 16 años.

Los participantes van tener que resolver los retos que se-yos propongan cruzando cifres reales d'audiencia de RTPA con otros datos públicos. Asina van poder rellacionar los índices d'audiencia coles variables sociales de los espectadores.