Los ingresos por COVID-19 siguen medrando

Les nueves vacunes bivalentes prevése que tean disponibles na seronda

La curva d'hospitalizaciones con COVID-19 n'Asturies tiende de nuevo al alza. Dende payares del añu pasáu la ocupación nun baxa del 2%, que ye lo que se considera como situación controlada.

No que llevamos d'añu llevamos yá dos picos d'hospitalizaciones y la curva tiende de nuevo al alza. El repique nun se nota, pel momentu, nes unidaes de críticos.

Si paramos nos contaxos de mayores de 60 años, los únicos que se contabilicen anguaño, la incidencia lleva un par de selmanes xubiendo y asítiase en niveles d'entamos de 2021.

Esti ye l'escenariu que presenta Asturies respecto al coronavirus y la so evolución, de lo que falamos con Matilde Cañelles, inmunóloga y investigadora del CSIC.

Cañelles afirma que si sigue l'enclín, podría dicise qu'entramos nuna nueva fola coles dos nueves variantes d'Ómicron, la BA.4 y la BA.5.

Según la inmunóloga, retiráronse demasiaes midíes mui apriesa, teniendo en cuenta qu'entá nun se punxera la cuarta dosis a los más mayores. Creo, apunta, que l'usu de los mázcaros tendría que caltenese o reinstaurarse n'espacios zarraos ensin ventilación, más agora col aumentu de casos.

Tocante a si tendríemos qu'esperar a les nueves vacunes, Cañelles señala que se podría yá esperar a les nueves dosis bivalentes que, previsiblemente, van tar disponibles na seronda, anque ella sí vacunaría a los mayores de 65 años coles yá esistentes.