Siero gana habitantes per primer vegada en seis años

El conceyu ye unu de los que más medra nel Principáu

Per primer vegada en seis años, Siero gana población. El conceyu suma cinco vecinos más que va un añu, hasta llegar a 51.667 habitantes, cuasi’l doble que va 100 años, afitándose na cuarta posición de los conceyos asturianos, namái per detrás de Xixón, Uviéu y Avilés.

Dende 1980, Siero ye de los conceyos que más medra, hasta algamar el máximu históricu en 2014, cuando superaba abondo los 52.000 habitantes.

La población ye amás una de les más moces d’Asturies, con un saldu vexetativu positivu.

En Siero, hai cuatro grandes núcleos de población. Llugones ye la parroquia más poblada, y la sesta del Principáu. Supera por poco a la capital, La Pola, dambes al rodiu de los 13.000.

En tercer llugar ta Viella, onde s’inxerta la Urbanización de La Fresneda, la más grande d’Asturies. Foi creada pola constructora Los Álamos. El so diseñu entamó nos años 70, y en 1987 llegaron los primeros habitantes.

Anguaño, La Fresneda ronda los 6.000 vecinos, que disponen prácticamente de tolos servicios. Lo primero en llegar foi’l Club de Campu, y darréu’l centru de salú, el colexu, la ilesia o la biblioteca. Agora ta faciéndose un institutu, y inclusive tienen partíu políticu propiu.

En cuantes a la población estranxera, en Siero predominen los rumanos, los chinos y los portugueses.