Situación d'abandonu nel barriu llangreanu d'El Puente

Cases en ruina, cais ensin ceres y presencia de rates, denuncien los vecinos

Fai malapenes cinco díes parte del teyáu d'una casa d'El Puente, en Llangréu, esbarrumbaba a bien pocos metros d'onde una madre pasiaba colos sos dos fíos. Y como esa, cuasi la metá de les cases del barriu tán abandonaes y inclusive dalguna, declarada n'estáu de ruines. Un peligru, denuncien los vecinos, al que'l Conceyu nun punxo remediu, tres cuasi una década de llucha vecinal.

Un pésimu estáu, el de les cases, al qu'hai que sumar el deterioru xeneralizáu del barriu, aislláu por unes obres de soterramientu de les víes que lleven siete años de retrasu nos que nun s'acometieron les obres necesaries. El resultáu: tendíu eléctricu cayíu, cais ensin ceres y agrietaes pol pasu los camiones, carreteres en mal estáu y zones abandonaes y invadíes pola maleza y la basura que son la redolada afayadiza pa les rates.

Unes quexes, dicen los vecinos, que nun atendieron dende la corporación saliente en cuatro años de mandatu. Agora esperen que dende'l nuevu equipu de gobiernu, que yá visitó la zona,-yos dean  soluciones pa recuperar un barriu que foi referente y güei ta en ruines.