Sontara, preparada pa fabricar a gran escala mazcarines homologaes

La planta asturiana espera tener el certificáu de Sanidá la próxima selmana

Sontara Asturies podría fabricar texíu pa facer más de nueve millones de mázcarines al día. El material ta homólogándose en collaboración col Ministeriu de Sanidá y la selmana que vien podríen tener el preste y entamar cola fabricación.

Hasta agora, Sontara Asturies facía balletes pa industria y alimentación, asina como tuayines pal sector sanitariu.

Cola crisis del coronavirus marcóse como prioridá facer n'Europa, na planta d'Asturies, texíu pa mazcarines y tamién bates quirúrxiques, qu'hasta agora fabricaben a gran escala namás nos Estaos Xuníos.

Amás taríen en disposición de medrar un turnu pa fabricar 24 hores, 365 díes.

Sontara Asturies tien capacidá pa facer dos tonelaes de texíu a la hora. Ésti destinaríase a fábriques de corte y costura pa da-yos forma, tanto n'España como en Francia, l'otru país interesáu col material qu'enantes facía Dupont y qu'agora pertenez a la multinacional suiza Jacob Holm.