Suárez garantiza que los grupos internivel caltienen la calidá educativa

Asegura qu’estes clases gozarán de los mesmos recursos que les demás

Los alumnos de distintos cursos que formen parte d’un grupu internivel tendrán garantizada la calidá educativa, según la conseyera d’Educación, Carmen Suárez, qu’insistió en qu’esti tipu de clases tienen un calter escepcional y que’l máximu de 20 alumnos per clase nun ta en discusión porque ye’l númberu avaláu pola Conseyería de Salú.

Suárez retrucaba asina nel plenu de la Xunta Xeneral del Principáu a una entruga del portavoz de Vox, Ignacio Blanco, que reclamó a la conseyera que medrare hasta 25 la ratio d’alumnos per aula porque nun diba insistir na seguridá y sí diba dexar acabar coles clases internivel.

N’opinión del diputáu de Vox, estos grupos tienen qu’eliminase porque nun ufierten una educación de calidá, nun respuenden a criterios pedagóxicos, ficiéronse de forma precipitada y chapucera y crean una fendidura educativa porque los centros privaos nun van recurrir a esti tipu de clases que xunten nuna mesma clase a estudiantes de delles edaes y niveles.