Tapia, pionera del surf n'España y Europa

Puxu de los negocios empobinaos a formar surfistes

Pa desplicar la relación del surf con Tapia tenemos que volver nel tiempu más de mediu sieglu.

En 1968 dos surfistes australianos, Peter y Robert Gulley, percorríen Europa coles sos tables. Un viaxe avezáu ente los mozos d'esti país que deciden venir a conocer el vieyu continente enantes de ponese a trabayar. Llegaron a Tapia, conocieron estes sableres y entamaron a surfear unes foles cuasi perfectes. A los dos díes decidieron siguir camín, pero con una sensación agridulce.

Asina llegó'l surf a esti conceyu y asina se convirtió Tapia en pionera d'esti deporte n'España y Europa.

Cada añu nacen nueves empreses pa formar a futuros surfistes. Un negociu en puxu que cada vez busca abrise a más xente de toles edaes y de toles condiciones físiques posibles. Un deporte que s'adapta tamién a persones con discapacidá. L'oxetivu ye que tol mundu puea sentir el contactu coles foles.