Taramundi, conceyu pioneru en turismu rural

Formó parte d'un proyectu pilotu p'afitar la creación d'esti tipu d'agospiamientos pa turistes

El costu de convertir l'antigua casa del cura de Taramundi en La Rectoral, foi de 85 millones de les antigües pesetes.

Nacía un tipu de turismu distintu, el rural. Yera la primer vegada n'España que s'apostaba por agospiamientos fuera de les grandes ciudaes. Quería testase si yera o non rentable dar abellu al veceru prácticamente nel mediu del monte, pero con tolos servicios.

¿Y por qué Taramundi y non otru conceyu? Un equipu de técnicos fixo'l trabayu de campu y Principáu y consistoriu dieron el pasu definitivu nun momentu d'incertidume económica. Yera 1986.

Nun s'enquivocaron. En más de tres décades creáronse 15.000 agospiamientos con más de 130.000 places en tol país. Un proyectu 'made in Asturies' con un oxetivu que siempres foi respetar la redolada y les tradiciones de la zona, pero con tou tipu de comodidaes. Un turismu en constante renovación.

Adaptáu a tou tipu de turistes. Los qu'apuesten por La Rectoral, un hotel de cuatro estrelles, o por otru tipu d'agospiamientu priváu onde ye posible esfrutar d'un fin de selmana, tando prácticamente solu.

Turistes que lleguen de toos llaos llamaos pola natura. Hasta'l mundu del cine interesóse por esti conceyu de 80 kilómetros cuadraos. Mario Casas rodó va unos meses equí escenes d'una de les sos películes. Perdese per estos llugares ye muncho más qu'una esperiencia.