Tecnoloxía asturiana pa la primer semeya d’un furacu negru

Asturfeito fizo 25 antenes pal radiotelescopiu asitiáu en Chile

La primer imaxe d’un furacu negru algamóse con tecnoloxía asturiana. La empresa Asturfeito fizo 25 antenes pal Observatoriu ALMA, la rede de satélites que trabayaron a comuña p’algamar esti avance históricu pa la ciencia.

Asturfeito fizo 25 antenes pal radiotelescopiu asitiáu a gran altura en Chile. La equipación salió de los talleres d’Avilés.

Coles antenes asturianes y la tecnoloxía de munchos otros países, algamóse lo que paecía imposible, recrear un gran telescopiu virtual con una antena equivalente a tola superficie de la tierra.

De tolos participantes, en total son ocho los telescopios asitiaos en Méxicu, Hawái, Arizona, Sierra Nevada, Antártida y Chile. El proyectu ALMA ye’l de mayor sensibilidá, lo qu’ayudó a xuntar les señales de tolos llugares, poro, la tecnoloxía desendolcada n’Asturies xugó un papel mui importante nesti avance pa la física.