Tuero dexa Deportes pa ser conceyal nel Ayuntamientu de Xixón

El socialista asegura que vuelve al consistoriu "pa sumar"

José Ramón Tuero dexará de ser Director Xeneral de Deportes pa tornar al Ayuntamientu de Xixón. Tuero ocupará la plaza vacante nel grupu socialista provocada pola renuncia de Begoña Fernández.

La diputada Natalia González, la siguiente na llista, renunció enantes d’ocupar esi cargu.

Tuero dimitirá de la so responsabilidá d’anguaño nes selmanes vinientes. En xineru recoyerá l’acta como conceyal.

Dempués d’un actu nel que participaron esta mañana, aseguró que vuelve al consistoriu xixonés, nel que yá tuvo va dos mandatos, pa sumar.

El nuevu conceyal resultó perdedor por un estrechu marxe nes primaries socialistes de Xixón énte Ana González.

Asegura, sicasí, que nun hai que buscar nengún tipu d’implicación al so desembarcu na política municipal.