Un proyectu pilotu va impulsar la movilidá eléctrica nel sector turísticu

Van instalase 20 puntos de recarga en negocios hoteleros pa particulares y servicios compartíos

El Principáu, al traviés de la Fundación Asturiana de la Enerxía (Faen), la patronal d'hostelería y turismu de la comunidá, Otea, y l'Asociación Empresarial pal Desarrollu y Impulsu de la Movilidá Eléctrica (Aedive) roblaron esti xueves un alcuerdu pa desenvolver un proyectu pilotu pa la promoción de la movilidá eléctrica nel sector turísticu.

L'alcuerdu, el primeru que se robla ente Aedive, una comunidá autónoma y una asociación hostelera, prevé la instalación de puntos de recarga de vehículos en venti establecimientos hoteleros pa usuarios particulares y empreses de servicios compartíos, unes infraestructures que van tener tecnoloxía contactless pal pagu con tarxeta o dispositivu móvil.

Pa desenvolver esti proyectu pilotu, Faen va apurrir 45.000 euros destinaos a la instalación de los puntos de recarga d'accesu públicu, los sistemes de monitorización pa llograr información detallada del usu de les infraestructures y la xeneración d'actividaes de concienciación y demostración qu'averen esta tecnoloxía a posibles usuarios, tanto particulares como empreses.