Un total de 12 conceyos esperen pola so toponimia

El procesu yá entamó pero ta en distintes fases

Tres l'aprobación de la toponimia d'Eilao, 66 de los 78 conceyos asturianos yá tienen la so toponimía tradicional aprobada. Solo falten 12 conceyos por aprobar la recuperación llingüística tradicional. En toos ellos, el procesu yá entamó pero ta en distintes fases. Nel final de la llista tán Pravia y Navia, qu'acaben d'entamar el so espediente.

D'otra manera, Salas y Castropol tiénenla mui avanzada namás pendiente de llegar a un alcuerdu p'afitar dos topónimos. Sicasí, en cinco conceyos l'espediente ta paralizáu por distintes causes. Esta situación socede en Cuideiru, Caravia, Llanera, Somiedu y Allande.

Ibias, Peñamellera Baxa y Cabrales tán pendientes d'unviar allegamientos a la Xunta de Toponimia.

Na próxima llexislatura espérase que remate'l procesu qu'entamó fai xusto 15 años. Ente los retos que'l Principáu va tener qu'encarar ta tamién avanzar nel usu de la toponimía, consiguir la especialidá docente pal profesoráu de Llingua Asturiana, y tomar midíes pa defender l'asturianu.

El nuevu parlamentu va decidir el futuru la llingua. Tres fuerces polítiques sofiten aprobar la oficialidá y faltaría namás un diputáu pa modificar l'estatutu d'autonomía.