Unos 200 manifestantes reclamen n'Uviéu estabilidá pa los interinos

Los sindicatos denuncien un abusu na contratación

Alredor de 200 persones concentráronse esti mediudía n'Uviéu pa reclamar la estabilización llaboral de los trabayadores que, según denuncien, sufren les consecuencies d'un abusu na contratación, según reivindicaron los sindicatos Suatea y Sintta y la Plataforma de Trabayadores Temporales.

Estos colectivos, convocantes de la protesta y de la xornada de fuelga pa esti xueves, repitieron el llamamientu a les Alministraciones Públiques pa que dexe iguar una situación qu'afecta a cerca de 5.000 trabayadores interinos nel sector de la enseñanza n'Asturies, cuasi un terciu de la plantiya docente.