Uviéu subastará 72 coches abandonaos

Una puya pa profesionales

El Conceyu d'Uviéu subasta 72 coches abandonaos na ciudá. Turismos y motos con dellos daños, qu'hasta tienen dientro pertenencies.

Tres llevar un mes na cai nel mesmu sitiu, la Policía Local llévalos al depósitu. Entama la busca y avisu a los propietarios. Si a los dos meses nun apaecen, el vehículu pasa a ser propiedá municipal. Ye la primer vez que'l Conceyu d'Uviéu los saca a subasta pública.

Son precios base. A partir d'ehí cada interesáu fai la so ufierta en sobre cerráu. La subasta namás ta abierta a profesionales con llicencia de desguace. Esta mañana, cinco empreses miráronlos enantes de participar.

Tolos vehículos tendrán que ser descontaminaos y depués podrán vender les pieces.

Un trámite qu'agora evita facer el Conceyu d'Uviéu y que, gracies a la subasta, algama una rentabilidá económica pa estos vehículos que yá nun tienen dueñu y nun puen circular.