Vipasa potenciará la comunicación y axilizará les quexes de los sos inquilinos

Facilitaráse'l siguimientu de les tramitaciones, meyores y reparaciones 

La Conseyería de Derechos Sociales y Bienestar comprometióse güei a impulsar un protocolu que dexe meyorar la comunicación y información a los inquilinos del parque públicu de Viviendes del Principáu (Vipasa), asina como a facilita-yos el siguimientu de les tramitaciones, meyores y reparaciones que tengan que facese nos sos llares.

El compromisu foi asumíu nuna xunta que tuvieron güei la conseyera, Melania Álvarez, y el director xeneral de Vivienda, Fermín Bravo, col coordinador d’IX d’Asturies, Ovidio Zapico, y la portavoz parllamentaria de la coalición, Ángela Vallina.

Nesti alcuentru dieron por acabáu’l desalcuentru ente socialistes y la coalición del martes pasáu na Xunta Xeneral del Principáu, por mor del enfrentamientu ente’l director de Vivienda y los portavoces de los grupos parllamentarios d’IX y Podemos.