Yá puen celebrase xuntes de vecinos respetando les distancies de seguridá y con mázcaru

Encamiéntase dexar esti tipu de xuntes pa más p'alantre, si les decisiones que se tienen que tomar nun son urxentes

Nesta selmana qu'entama yá hai comunidaes de propietarios que van celebrar les xuntes que quedaron pendientes cuando se decretó l'estáu d'alarma. Tán autorizaes siempres que se caltenga la separtación de metru y mediu y s'use mázcaru al tar n'espacios zarraos.

Sicasí, los alministradores de finques aconseyen que namás se convoquen si ye por un asuntu urxente, que duren lo menos posible, non más de 45 minutos, y que vaya una persona por pisu.

La responsabilidá si hai contaxos por coronavirus sedría de la comunidá, asina que dende'l colexu d'alministradores apelen a la prudencia. Lo mesmo nel usu de les piscines privaes onde se relaxaron les llendes d'aforu.

Los costos de caltenimientu d'esti tipu d'instalaciones medraron, pero yá non tanto como p'aquelles comunidaes de vecinos qu'abrieron les piscines fai unes selmanes cuando les esixencies yeren mayores.