Mavea cierra'l so blogue sobre natura énte la "marabunda" de desaprensivos

"Cualquier semeya que ponemos yá ye un aliciente pa qu'haya molesties"

El Grupu d'Ornitoloxía Mavea anunció esti vienres la so decisión de cerrar el so blogue sobre natura asturiana, onde rexistraba les migraciones de les aves al so pasu pel estuariu avilesín, énte'l comportamientu desaprensivu de la "marabunda” de visitantes que “tría plantes y espanta aves”.

Mavea entamó fai 16 años l'andadura del blogue http://paxaros-en-la-ria-de aviles.blogspot.com/, unu de los primeros sobre natura asturiana, col envís d'espublizar l'interés ornitolóxicu del estuariu avilesín y de la so redolada.

Asina, al traviés de testos, datos y semeyes, muncha xente conoció l'avifauna de la ría y, tres 1.386 entraes, “creemos que cumplimos la xera”, aseguró la organización conservacionista nuna nota.

Pa Mavea, la divulgación y el caltenimientu van xuníos, y asina lo lleva tresmitiendo 36 años.