Descubren una nueva especie de crustaceu nel área protexida d’El Cachuchu

L’Astacilla andresmeixidei, ye un isópodu "adaptáu a una vida arbustiva"

Una nueva especie de crustaceu que presenta "interesantes adaptaciones arbustives" sobre gorgonies marines foi descubierta por un grupu internacional d’investigadores a 500 metros de profundidá nel área protexida d’El Cachuchu, nel Cantábricu asturianu.

Esti nuevu exemplar, l’Astacilla andresmeixidei, ye un isópodu "adaptáu a una vida arbustiva", porque tien tres pares de pates nel brazu curtiu que-y dexen agarrase a les rames y aguantar les corrientes del fondu marín, afirmen los investigadores de la Unidá de Cultura Científica y de la Innovación (UCC+i) de la Universidá madrilana d’Alcalá d’Henares.

Amás, les pates anteriores, que son más llargues y flexibles, "perdieron la so función llocomotora" pero son usaes "a mou de cedazu", pa garrar les partícules alimenticies qu’arrastren les corrientes, según un comunicáu del centru universitariu.

El xéneru al que pertenez el crustaceu, denomáu Astacilla, presenta un "fuerte dimorfismu sexual", con machos de menor tamañu y femes que guarden nel so dilatáu segmentu central los güevos, que crea una cámara que protexe a la so prole.

Los investigadores bautizaron esta nueva especie como Astacilla andresmeixidei, n’homenaxe al dibuxante gallegu Andrés Meixide, y "por mor del so pequeñu tamañu recibió’l nome común de 'andresito'", afirma la UCC+i.

Na busca y descripción de darréu participaron investigadores de la Universidá d’Alcalá (UAH), el Muséu d’Okendo, l’Institutu Español d’Oceanografía (IEO) y el británicu Natural History Museum.