Operación precursora con güesu de cadabre p'afitar la columna

Tres intervenciones sumaron un total de 24 hores d'operación

Jesús Álvarez ye un uvieín de 44 años que pasó l’últimu añu, l’añu de la pandemia, ingresáu nel HUCA. Un procesu infecciosu estrozára-y la columna y teníalu echáu y con dolores. Gracies a una operación única, pudo salir a pie del hospital.

Pa devolve-y la movilidá, hubo que recurrir a una ciruxía, dividida en tres intervenciones, que sumaron un total de 24 hores d’operación. Fizo falta llimpiar les vértebres infestaes y usar güesu de cadabre p’afitar la columna.  

En palabres del neurociruxanu Kelvin Piña, "un gran retu y un milagru quirúrxicu" porque algamóse que’l paciente volviere a caminar ensin sufrir secueles de la propia ciruxía .

Cuando Jesús entró nel hospital, el COVID-19 sonaba entá lloñe. Foi una etapa mui dura pa él, un añu d’hospitalización, coles llendes nes visites y les duldes sobre la so recuperación. L’alta hospitalaria devuélve-y la ilusión. Vuelve a casa y failo ensin siella de ruedes. 

Agora namás-y queda caminar pa fortalecer los músculos y esfrutar de la compañía de la so familia.