Una aplicación móvil que detecta’l ciberacosu y borra los mensaxes

El proyectu 'Sokoiki' ye’l ganador de la última edición del ExplorerLab Uviéu

Olaya Morán ye estudiante de Telecomunicaciones na Universidá d’Uviéu y desendolcó una aplicación pa móviles que detecta’l cyberbullying, mensaxes d’acosu que puean recibir los menores d’edá nos sos dispositivos.

L’aplicación esborria los mensaxes enantes de que seya lleíos polos neños y adolescentes, pero avisa a los padres de la esistencia d’esos mensaxes d’acosu.

Olaya decidió crear esta ferramienta, llamada 'Sokoiki,' a la vista del aumentu de casos de ciberacosu, por mor de que cada vez más menores se conecten a la rede. Una ferramienta que nun hai anguaño nel mercáu y que resultó ganadora de la última edición del ExplorerLab Uviéu.

Olaya defenderá’l martes el so proyectu frente a otros 16 d‘España, Portugal y países de llatinoamérica. El ganador final podrá siguir desarrollando’l so proyectu per tres meses nel Explorer Residence del Bancu Santander.