Xixón presenta l’únicu Seat 600 eléctricu del país

Citech acueye esta adaptación ecolóxica del míticu automóvil de los 60

Xixón conoció’l primer y únicu Seat 600 eléctricu del país; una adaptación d’un coche vieyu de va 60 años que se convirtió, ensin dulda, nuna de les principales atracciones del Congresu d’Industria y Tecnoloxía (Citech) que se celebra hasta mañana nel recintu ferial Luis Adaro de la ciudá.

Les redes sociales y medios de comunicación fueron los aliaos pa que se diere a conocer y s’algamaren los materiales afayadizos, y güei, esti 600, sigue modernizándose.

Unu de los meyores exemplos de la evolución de la industria y la tecnoloxía del momentu; el sieglu XXI adapta y actualiza unu de los productos automovilísticos estrella de la segunda metá del sieglu pasáu, qu’entamó a fabricar Seat España en 1957, al preciu de 60.000 de les antigües pesetes (unos 360 euros); y qu’enagora ye ecolóxicu.